1:1 | Deri-pada itu ktua k-pada Nyonya yang terpileh dngan anak-anak-nya, yang smoa-nya sahya kaseh dalam kbtulan; dan bukan saja sahya ini, ttapi sgala orang yang sudah tahu kbtulan itu; |
1:2 | kita punya kaseh itu deri sbab kbtulan yang tinggal dalam kita, dan nanti ada sama-sama kita s-lama-lama-nya: |
1:3 | anugrah dan ksian dan sntosa nanti bersama-sama kita, deri-pada Allah Bapa itu, dan deri-pada Isa Almaseh, Anak Bapa itu, dalam kbtulan dan kaseh. |
1:4 | Sahya banyak suka-hati sbab sahya sudah jumpa ada brapa anak-anak Nyonya berjalan dalam kbtulan, sperti kita sudah trima hukum deri Bapa. |
1:5 | Dan skarang, hei Nyonya, bukan-nya sperti sahya ada tulis satu hukum yang bharu k-pada Nyonya, ttapi itu hukum yang kita sudah ada deri mula-mula, ia'itu sahya minta sama Nyonya yang kita kaseh satu sama lain. |
1:6 | Dan ini-lah kaseh, ia'itu yang kita berjalan turut hukum-hukum-nya. Ini-lah itu hukum, sperti kamu smoa sudah dngar deri mula-mula, yang kamu msti berjalan dalam-nya. |
1:7 | Kerna banyak pnipu sudah terkluar masok dunia ini, orang yang t'ada mngaku Isa Almaseh itu datang dngan k'ada'an manusia. Ini-lah pnipu itu, dan Almaseh punya lawan. |
1:8 | Preksa-lah diri kamu sndiri, spaya kamu jangan hilang perkara-perkara yang kita sudah kerjakan, ttapi spaya kamu boleh trima kamu punya pahala dngan s-chukop-nya. |
1:9 | Barang-siapa yang berjalan dhulu dan t'ada tinggal ttap dalam Almaseh punya ajaran, Allah t'ada sama itu orang: orang yang tinggal ttap dalam ajaran itu, sama itu orang ada Bapa itu, dan Anak pun. |
1:10 | Jikalau siapa pun datang sama kamu, dan t'ada bawa ini ajaran, jangan sambot dia masok rumah, dan tabek pun jangan kasi sama dia: |
1:11 | kerna orang yang kasi tabek sama dia, ada s-bhagian dalam pkerja'an-nya yang jahat itu. |
1:12 | Sahya ada banyak perkara mau tulis k-pada kamu smoa, ttapi sahya t'ada mau tulis dngan kertas sama tinta: ttapi sahya harap mau pergi k-pada kamu, dan berchakap dngan s-muka, spaya kamu punya ksuka'an boleh di-gnapkan. |
1:13 | Anak-anak Nyonya punya sudara prempuan yang terpileh smoa-nya kirim tabek k-pada Nyonya. |