4:1 | Hei sgala kkaseh, jangan perchaya tiap-tiap roh, ttapi uji-lah sgala roh itu, ada-kah dia deri-pada Allah: kerna banyak nabi-nabi bohong sudah terkluar masok dunia ini. |
4:2 | Kita boleh tahu Roh Allah dngan ini, ia'itu tiap-tiap roh yang mngaku yang Isa Almaseh itu sudah datang dngan k'ada'an manusia, roh itu-lah deri-pada Allah: |
4:3 | dan tiap-tiap roh yang t'ada mngaku Isa, itu roh bukan deri-pada Allah: dan ini-lah Almaseh punya lawan punya roh, yang kamu sudah dngar nanti datang; dan ini skarang pun dia sudah ada di dunia. |
4:4 | Hei anak-anak kchil, kamu ini deri-pada Allah, dan kamu sudah kalahkan dia-orang: kerna dia yang dalam kamu itu ada lbeh bsar deri-pada dia yang ada di dalam dunia. |
4:5 | Dia-orang ini deri-pada dunia: itu sbab-lah dia-orang chakap deri-pada dunia, dan dunia ini dngar sama dia-orang. |
4:6 | Kita ini deri-pada Allah: orang yang knal Allah dngar sama kita; orang yang bukan deri-pada Allah t'ada dngar sama kita. Dngan ini kita boleh tahu roh kbtulan dan roh kssatan. |
4:7 | Hei sgala kkaseh, biar-lah kita kaseh satu sama lain: kerna kaseh itu deri-pada Allah; dan tiap-tiap orang yang ada kaseh, dia sudah di-beranakkan deri-pada Allah, dan dia knal sama Allah. |
4:8 | Orang yang tidak ada kaseh, dia itu t'ada knal sama Allah, kerna Allah dia-lah kaseh. |
4:9 | Kaseh Allah sudah di-nyatakan dalam kita punya hal dngan ini, ia'itu yang Allah sudah hantarkan Anak-nya yang tunggal itu masok dunia ini, spaya kita boleh hidop oleh dia. |
4:10 | Kaseh itu ada dalam ini hal, ia'itu bukan dalam hal kita sudah kaseh sama Allah, ttapi dalam hal Allah sudah kaseh sama kita, dan sudah hantarkan Anak-nya mnjadi korban perdamaian kerna dosa-dosa kita. |
4:11 | Hei sgala kkaseh, jikalau bgitu-lah Allah sudah kaseh sama kita, patut-lah kita pun kaseh satu sama lain. |
4:12 | T'ada satu orang pun sudah tengok Allah baik bila pun: jikalau kita kaseh satu sama lain, Allah tinggal dalam kita, dan kaseh-nya nanti di-smpurnakan dalam kita: |
4:13 | kita boleh tahu yang kita tinggal dalam dia dan dia dalam kita dngan ini, ia'itu sbab dia sudah kasi kita s-bhagian deri-pada Roh-nya. |
4:14 | Dan kita sudah tengok dan kita bersaksi yang Bapa sudah hantarkan Anak itu mnjadi ini dunia punya Juru-slamat. |
4:15 | Barang-siapa nanti mngaku yang Isa itu Anak Allah, Allah tinggal dalam itu orang, dan dia dalam Allah. |
4:16 | Dan kita sudah tahu dan sudah perchaya itu kaseh yang Allah ada dalam kita punya hal. Allah dia-lah kaseh; dan orang yang tinggal dalam kaseh, dia-lah tinggal dalam Allah, dan Allah pun tinggal dalam dia. |
4:17 | Dngan ini hal-lah kaseh di-smpurnakan sama kita, spaya kita dapat brani-hati tempo hari hukuman; kerna sama sperti dia ada, bgitu-lah kita pun dalam dunia ini. |
4:18 | Dalam kaseh tidak ada ktakotan: ttapi kaseh yang smpurna buangkan ktakotan, kerna ktakotan bawa seksa; dan orang yang ada takot, blum-lah smpurna dia punya kaseh. |
4:19 | Kita ada kaseh, sbab dia sudah kaseh sama kita lbeh dhulu. |
4:20 | Jikalau satu orang bilang, "Sahya ada kaseh sama Allah," dan bnchi pula dia punya sudara, itu orang satu pmbohong: kerna orang yang t'ada kaseh sama sudara-nya yang dia sudah tengok, ta'boleh kaseh sama Allah yang dia blum tengok. |
4:21 | Dan ini hukum-lah kita dapat deri-pada Tuhan, ia'itu orang yang kaseh Allah, msti kaseh sama sudara-nya pun. |