1:1 | Deri-pada Paulus, Isa Almaseh punya orang terpasong, dan deri-pada kita punya sudara Timotius, datang k-pada Filemon, kita punya kkaseh dan kawan dalam kerja, |
1:2 | dan k-pada kita punya sudara Appia, dan k-pada Arkhippus kita punya kawan soldado, dan k-pada eklisia yang dalam rumah angkau: |
1:3 | biar-lah anugrah dan sntosa datang k-pada angkau deri-pada Bapa kita Allah, dan deri-pada Tuhan kita Isa Almaseh. |
1:4 | Slalu sahya mnguchap shukor k-pada sahya punya Allah, serta sbot nama angkau dalam sahya punya do'a, |
1:5 | sbab dngar khabar fasal angkau punya kaseh, dan perchaya yang angkau tunjok k-pada Tuhan kita Isa, dan k-pada smoa orang kudus; |
1:6 | dan sahya minta spaya angkau punya perchaya punya perskutuan boleh mnjadi berkuasa kerna Almaseh, dalam hal angkau dapat tahu deri-hal tiap-tiap perkara yang baik yang ada dalam kamu smoa. |
1:7 | Kerna sahya sudah dapat banyak ksuka'an dan pnghiburan dalam angkau punya kaseh, sbab orang-orang kudus punya hati di-sgarkan oleh angkau, hei sudara. |
1:8 | Sbab itu, sunggoh pun dalam Almaseh sahya chukop brani psan angkau buat apa-apa yang patut, |
1:9 | ttapi deri kaseh punya sbab, sahya lbeh suka minta sama angkau, sdang sahya orang bgini, ia'itu Paulus orang tua ini, dan skarang mnjadi Isa Almaseh punya orang terpasong: |
1:10 | sahya minta sama angkau deri-hal anak sahya yang sahya sudah beranakkan dalam hal sahya kna pasong ini, ia'itu Onesimus, |
1:11 | yang dhulu t'ada berguna sama angkau, ttapi skarang ada berguna sama angkau, dan sama sahya pun; |
1:12 | dan dia punya diri sahya sudah hantarkan balek k-pada angkau, ia'itu sahya punya jantong hati: |
1:13 | dan sahya suka tahankan dia sama-sama sahya, spaya dia boleh layankan sahya dalam injil punya pasong ganti angkau: |
1:14 | ttapi satu pun sahya ta'mau buat kalau angkau t'ada s-tuju; spaya jangan angkau punya kbaikan datang sperti sbab kna paksa, ttapi sbab sndiri suka. |
1:15 | Kerna barangkali ini-lah sbab-nya dia sudah di-chraikan deri-pada angkau sikit lama, ia'itu spaya angkau boleh dapat dia s-lama-lama-nya; |
1:16 | bukan lagi sperti satu hamba, ttapi lbeh deri-pada hamba, ia'itu sudara yang kkaseh, terlbeh skali k-pada sahya, ttapi brapa lbeh lagi k-pada angkau pula, baik dalam hal manusia, baik dalam hal Tuhan. |
1:17 | Sbab itu jikalau angkau bilangkan sahya ini satu sohbat, sambot-lah sama dia sperti diri sahya sndiri. |
1:18 | Ttapi kalau dia sudah kasi apa-apa rugi sama angkau, atau ada hutang apa-apa, masokkan itu dalam sahya punya kira-kira; |
1:19 | sahya ini Paulus tulis dngan sahya sndiri punya bkas tangan, yang sahya nanti bayerkan: jangan sbot yang angkau punya diri jadi angkau punya hutang sama sahya. |
1:20 | Ya, sudara, biar-lah sahya dapat untong dalam Tuhan deri-pada angkau: sgarkan-lah sahya punya hati dalam Almaseh. |
1:21 | Sahya tulis sama angkau, sbab sahya harap angkau nanti turut-prentah, dan sahya tahu angkau nanti buat lbeh deri-pada sahya punya kata. |
1:22 | Dalam pada itu, siapkan satu tmpat tumpang kerna sahya, sbab sahya harap yang dngan kamu smoa punya do'a, sahya nanti di-anugrah-kan k-pada kamu. |
1:23 | Ipafras, yang kna pasong sama-sama sahya kerna Isa Almaseh, kirim tabek k-pada angkau; |
1:24 | dan Markus, Aristarkus, Demas, dan Lukas, yang smoa-nya jadi sahya punya kawan kerja. |
1:25 | Biar-lah anugrah Tuhan kita Isa Almaseh bersama-sama kamu smoa punya roh. Amin. |