| 1:1 | Deri-pada Paulus dan Silwanus dan Timotius, datang k-pada eklisia orang Tisalonika yang dalam Bapa kita Allah, dan dalam Tuhan kita Isa Almaseh; |
| 1:2 | biar-lah datang k-pada kamu anugrah dan sjahtra deri-pada Bapa kita Allah dan deri-pada Tuhan kita Isa Almaseh. |
| 1:3 | Patut-lah kita slalu mnguchap shukor k-pada Allah deri sbab kamu, hei sudara-sudara, sperti yang patut juga, sbab kamu punya perchaya ada sangat bertambah-tambah, dan sbab kamu masing-masing punya kaseh ada mlempah satu sama lain; |
| 1:4 | sampaikan kita ini pun mgahkan kita punya diri deri-hal kamu dalam smoa eklisia Allah, deri sbab kamu punya sabar dan perchaya dalam smoa aniaya dan ksusahan yang kamu mnanggong; |
| 1:5 | ia'itu satu tanda hukuman Allah yang adil itu, spaya kamu di-bilangkan layak kerna kraja'an Allah, yang kerna-nya kamu kna susah; |
| 1:6 | kalau di dpan Allah mnjadi adil balaskan ksusahan sama orang yang susahkan kamu, |
| 1:7 | dan atas kamu yang kna susah pula perhentian sama-sama kita, waktu Tuhan Isa di-nyatakan deri shorga dngan mla'ikat-mla'ikat yang jalankan dia punya kuasa |
| 1:8 | dngan nyala api, kasi pmbalasan atas orang yang t'ada knal Allah, dan atas orang yang derhaka k-pada Tuhan kita Isa punya injil: |
| 1:9 | itu orang smoa nanti kna seksa, ia'itu kbinasa'an yang kkal jauh deri-pada muka Allah, dan deri-pada kuasa-nya punya kmulia'an. |
| 1:10 | waktu dia nanti datang spaya di-muliakan dalam dia punya orang-orang kudus, dan mnjadi satu hairan itu hari dalam hal smoa orang yang sudah perchaya (kerna kita punya ksaksian sama kamu sudah juga kamu perchaya). |
| 1:11 | Dan slalu kita ada minta do'a kerna ini deri-hal kamu, ia'itu spaya kita punya Allah boleh bilangkan kamu ini padan dngan kamu punya panggilan, dan spaya dngan dia punya kuasa dia boleh chukopkan tiap-tiap ksuka'an deri-hal yang baik dan tiap-tiap kerja yang datang deri perchaya; |
| 1:12 | sampaikan nama Tuhan kita Isa boleh di-muliakan dalam kamu ini, dan spaya kamu pula boleh di-muliakan dalam dia sperti anugrah Allah dan Tuhan kita Isa Almaseh. |
2 Tesalonika 1 - Alkitab Melayu Baba
