1:1 | Deri-pada Paulus dan Silwanus dan Timotius, datang k-pada eklisia orang Tisalonika yang dalam Bapa kita Allah dan Tuhan kita Isa Almaseh: biar-lah anugrah sama kamu dan sjahtra pun. |
1:2 | Kita slalu ada mnguchap shukor k-pada Allah kerna kamu smoa, serta sbotkan kamu punya nama dalam sgala do'a kita, |
1:3 | dan dngan t'ada berrnti-rnti kita ada ingat dpan Bapa kita Allah kamu punya kerja yang kluar deri-pada perchaya, dan kamu punya pnat yang kluar deri-pada kaseh, dan kamu punya sabar yang kluar deri-pada harap sama Tuhan kita Isa Almaseh; |
1:4 | sbab kita tahu kamu punya hal kna pileh, hei sudara-sudara yang Allah kaseh, |
1:5 | sbab kita punya injil sudah sampai k-pada kamu bukan-nya dngan perkata'an saja, ttapi dngan kuasa pun, dan dngan Roh Alkudus, dan dngan sangat ktntuan; sperti kamu pun tahu apa macham punya orang kita sudah jadi di antara kamu deri sbab kamu. |
1:6 | Dan kamu bharu sudah turut kita punya tuladan, dan tuladan Tuhan pun, dalam hal kamu sudah sambot perkata'an itu dngan banyak ksusahan, dan dngan suka-hati yang datang deri-pada Roh Alkudus; |
1:7 | sampaikan kamu mnjadi chontoh k-pada smoa orang yang perchaya di Makadoniah dan di Akhayah pun. |
1:8 | Kerna deri-pada kamu-lah sudah berbunyi perkata'an Tuhan, bukan saja di Makadoniah dan Akhayah, ttapi di mana-mana tmpat pun sudah pchah khabar fasal kamu punya perchaya dalam Tuhan; sampai ta'usah lagi kita ini kata apa-apa. |
1:9 | Kerna dia-orang sndiri khabarkan deri-hal kita, bagimana hal kita datang jumpa sama kamu; dan bagimana hal kamu sudah balek k-pada Allah deri-pada datok-datok, spaya boleh mnjadi hamba k-pada Allah yang hidop dan yang btul itu, |
1:10 | dan mnantikan Anak-nya punya kdatangan deri shorga, yang dia sudah bangkitkan deri antara orang-orang mati, ia'itu Isa, yang lpaskan kita deri-pada marah yang mndatang. |