3:1 | Sbab itu, jikalau kamu sudah di-bangkitkan sama-sama Almaseh, chari-lah perkara-perkara yang di atas, di tmpat yang Almaseh itu ada, di sblah kanan Allah kdukokkan-nya. |
3:2 | Biar-lah kamu baik-baik ingat perkara-perkara yang di atas, jangan perkara-perkara yang di bumi ini. |
3:3 | Kerna kamu sudah mati, dan kamu punya hidop skarang ada tersmbunyi sama-sama Almaseh dalam Allah. |
3:4 | Bila Almaseh yang mnjadi kita punya hidop itu nanti di-nyatakan, bharu-lah kamu pun nanti di-nyatakan sama-sama dia dngan kmulia'an. |
3:5 | Sbab itu matikan-lah sgala anggota kamu yang di bumi ini, ia'itu persundalan, kchmaran, nafsu, k'inginan jahat, dan tma'a, ia'itu smbahyang sama datok juga; |
3:6 | dan deri sbab ini smoa Allah punya marah turun di atas anak-anak derhaka; |
3:7 | dan kamu pun dhulu sudah bawa diri kamu dalam itu hal, ktika kamu ada lagi hidop dalam-nya. |
3:8 | Ttapi skarang tolakkan-lah smoa ini, ia'itu sperti marah, gram, kjahatan, umpatan, perkata'an mncharut yang kluar deri mulut kamu: |
3:9 | jangan chakap bohong satu sama lain; sbab kamu sudah tanggalkan diri kamu yang lama itu dngan smoa klakuan-nya, |
3:10 | dan sudah knakan diri yang bharu itu, yang ada di-bharukan sampai dapat sgala pngtahuan, ikut rupa Allah yang mnjadikan dia: |
3:11 | dan dalam itu hal t'ada lagi ada orang Grik dan orang Yahudi, orang bersunat dan orang ta'bersunat, orang bangsa-asing, atau orang Skuti, orang hamba atau bebas: ttapi Almaseh-lah smoa dan dalam smoa. |
3:12 | Sbab, itu sperti Allah punya orang pilehan, yang kudus dan kkaseh, knakan-lah hati yang berksian, murah-hati, rndah-hati, lmah-lmbot, dan panjang hati; |
3:13 | sabarkan satu sama lain, dan ampunkan satu sama lain, jikalau barang-siapa ada pngaduan atas lain orang; s-bagimana Tuhan sudah ampunkan kamu, bgitu juga kamu pun; |
3:14 | dan di atas ini smoa knakan-lah kaseh, ia'itu pngikat ksmpurna'an. |
3:15 | Dan biar-lah sntosa Almaseh bicharakan dalam kamu punya hati, kerna kamu sudah di-panggil spaya dapat sntosa itu dalam badan yang satu; dan jadi-lah orang yang trima-kaseh. |
3:16 | Biar-lah perkata'an Almaseh tinggal dalam kamu dngan kkaya'an-nya dan dngan s-habis-habis bijaksana: dan ajarkan dan nasihatkan satu sama lain dngan mazmur dan puji-pujian dan nyanyian yang rohani, dan nyanyi-lah dngan anugrah k-pada Allah dalam kamu punya hati. |
3:17 | Dan apa-apa yang kamu buat, baik dalam perkata'an baik dalam perbuatan, biar-lah smoa-nya dalam nama Tuhan kita Isa, sambil mnguchap shukor k-pada Bapa kita Allah oleh dia. |
3:18 | Hei sgala bini orang, tundok-lah k-pada kamu punya laki, sperti yang patut dalam Tuhan. |
3:19 | Hei sgala laki orang, kaseh-lah sama kamu punya bini, dan jangan jadi sakit-hati sama dia-orang. |
3:20 | Hei sgala anak-anak, turut-lah prentah mak-bapa kamu dalam smoa perkara, kerna bgini-lah berknan dalam Tuhan. |
3:21 | Hei sgala bapa, jangan-lah kamu panaskan hati anak-anak kamu, spaya jangan mnjadi tawar hati. |
3:22 | Hei sgala hamba orang, biar-lah dalam sklian perkara kamu turut prentah orang yang jadi kamu punya tuan dalam hal dunia; bukan-nya sperti kerja bermuka-muka, mau sukakan manusia, ttapi dngan tulus hati, dan dngan takot sama Tuhan: |
3:23 | baik apa kamu buat, kerja-lah dngan sunggoh hati, sperti k-pada Tuhan dan bukan-nya k-pada manusia; |
3:24 | sbab kamu tahu juga yang deri-pada Tuhan kamu nanti trima psaka itu jadi kamu punya pahala: kamu ini ada mnjadi hamba k-pada Tuhan kita Almaseh. |
3:25 | Kerna orang yang buat salah, ksalahan-nya nanti pulang balek di atas dia: dan t'ada nanti ada tengok-tengok muka orang. |