1:1 | Deri-pada Paulus, rasul Isa Almaseh dngan kahandak Allah, datang k-pada sgala orang kudus yang di Ifisus, dan k-pada orang-orang yang perchaya dalam Isa Almaseh: |
1:2 | biar-lah datang atas kamu anugrah dan sntosa deri-pada Bapa kita Allah, dan deri-pada Tuhan kita Isa Almaseh. |
1:3 | Sgala puji k-pada Allah, ia'itu Bapa Tuhan kita Isa Almaseh, yang sudah berkatkan kita dalam Almaseh dngan sgala berkat yang rohani di shorga punya tmpat: |
1:4 | sama sperti dia sudah pileh sama kita dalam Almaseh s-blum kjadian dunia, spaya kita boleh mnjadi kudus dan t'ada berchla di dpan Tuhan dalam kaseh: |
1:5 | dan dia sudah tntukan lbeh dhulu mau angkatkan kita mnjadi anak-anak-nya oleh Isa Almaseh kerna diri-nya, sperti yang berknan k-pada hati-nya, |
1:6 | mau dapat puji sbab anugrah-nya punya kmulia'an yang dia sudah anugrahkan k-pada kita dalam kkaseh-nya: |
1:7 | yang dalam-nya kita sudah dapat tbusan oleh darah-nya, ia'itu k'ampunan dosa-dosa kita, turut sperti anugrah-nya punya kkaya'an, |
1:8 | yang dia sudah lempahkan atas kita dngan s-habis-habis budi dan bijaksana, |
1:9 | dan dia sudah kasi tahu sama kita kahandak-nya punya ruhsia, turut sperti maksud-nya yang baik yang dia sudah tntukan dalam Almaseh, |
1:10 | mau prentahkan ini dunia bila waktu-nya sudah gnap, mau jmlahkan sgala perkara dalam Almaseh, baik yang di shorga baik yang di bumi: ia'itu dalam dia, |
1:11 | yang dalam-nya kita sudah di-jadikan satu psaka, sbab kita lbeh dhulu sudah di-tntukan mnurut maksud Tuhan yang jalankan smoa perkara sperti yang sudah di-bicharakan dngan kahandak-nya sndiri; |
1:12 | spaya kita ini yang lbeh dhulu sudah taroh harap dalam Almaseh boleh datangkan dia punya kmulia'an punya puji: |
1:13 | dalam dia kamu ini pun, bila kamu sudah dngar itu kbtulan punya perkata'an, ia'itu injil yang slamatkan kamu,-dalam dia juga, bila kamu sudah perchaya, kamu sudah di-silkan dngan Roh Alkudus yang sudah di-janjikan, |
1:14 | yang mnjadi kita punya psaka punya chngkram, sampaikan Allah sndiri punya herta dapat tbus, mau bawa dia punya kmulia'an punya puji. |
1:15 | Deri sbab itu sahya pun, deri-pada waktu sahya dngar fasal itu perchaya yang kamu ada di dalam Tuhan Isa, dan kamu punya kaseh k-pada sgala orang kudus, |
1:16 | t'ada-lah sahya brenti mnguchap shukor kerna kamu, dan sahya sbot kamu punya nama dalam sahya punya do'a smoa; |
1:17 | spaya Tuhan kita Isa Almaseh punya Allah, ia'itu Bapa kmulia'an, boleh anugrahkan k-pada kamu roh bijaksana dan knyata'an dalam hal kamu knal sama dia dngan s-pnoh-nya, |
1:18 | sdang kamu punya mata-hati boleh di-trangkan, sampai kamu tahu apa-kah dia punya panggilan punya harap, apa macham kaya kmulia'an psaka-nya dalam orang kudus, |
1:19 | dan bagimana terlalu sangat kuasa-nya kerna kita yang ada perchaya, turut sperti pkerja'an kuat-kuasa-nya; |
1:20 | yang dia sudah kerjakan dalam Almaseh waktu dia bangkitkan dia deri antara orang-orang mati, dan kasi dia dudok sblah kanan-nya di shorga punya tmpat, |
1:21 | atas sgala hukum, dan kuasa, dan kkuatan, dan prentah, dan tiap-tiap nama yang orang sbot, baik dalam ini jman, atau dalam jman yang mndatang: |
1:22 | dan Allah sudah tundokkan smoa perkara di bawah kaki-nya, dan sudah kasi dia jadi kpala dalam sgala perkara atas eklisia, |
1:23 | yang mnjadi dia punya badan, ia'itu kpnohan dia yang pnohkan sklian dalam sklian. |