3:1 | Bila Kaisar Tibirius sudah jadi raja lima-blas tahun punya lama, waktu Pontius Pilatus jadi gobernor di tanah Yahudiah, dan Herodis jadi raja Galil, dan sudara-nya Filipus jadi raja dalam jajahan Ituriah sama Trakhonitis, dan Lusanias raja Abilene, | 3:2 | dan Hanna sama Kayafa jadi imam-bsar, itu waktu perkata'an Allah datang sama Yahya anak Zakaria di tanah sunyi. | 3:3 | Dan dia masok sluroh jajahan sungai Yordan, khabarkan baptisan tobat kerna ampun dosa-dosa orang; | 3:4 | sperti ada tersurat dalam kitab perkata'an nabi Yash'aya, "Suara satu orang yang bertriak di tanah sunyi, 'Sdiakan jalan Tuhan, Btulkan lorong-lorong-nya.' | 3:5 | Tiap-tiap lmbah nanti di-tambakkan, Dan tiap-tiap gunong dan bukit pun nanti di-rndahkan; Dan yang bengkok nanti mnjadi lurus, Dan yang berbatu nanti jadi jalan yang rata; | 3:6 | Dan sklian manusia nanti tengok Allah punya slamat." | 3:7 | Sbab itu Yahya kata sama orang-banyak yang sudah kluar spaya trima baptis deri-pada dia, "Hei kturunan ular, siapa sudah ajarkan kamu lari deri-pada marah yang nanti datang? | 3:8 | Sbab itu kluarkan-lah buah-buah yang padan dngan tobat, dan jangan mula'i kata dalam hati sndiri, 'Kita ada Ibrahim jadi kita punya bapa:' kerna sahya kata sama kamu, yang deri-pada ini batu-batu pun Allah ada kuasa adakan anak-chuchu kerna Ibrahim. | 3:9 | Dan skarang sudah pun ada kapak terltak dkat pokok-pokok punya akar: sbab itu, tiap-tiap pokok yang t'ada kluarkan buah yang baik, itu pokok kna tbang, dan kna buang dalam api." | 3:10 | Dan itu orang-banyak tanya sama dia, "Kalau bgitu apa-kah kita msti buat?" | 3:11 | Dan dia jawab kata sama dia-orang, "Orang yang ada dua lai baju, biar dia bhagikan sama orang yang t'ada, dan orang yang ada makanan, biar dia pun buat bgitu juga." | 3:12 | Dan ada orang yang pungut chukai pun datang mau trima baptis, dan dia-orang kata sama dia, "Guru, apa-kah kita msti buat?" | 3:13 | Dan dia kata sama dia-orang, "Jangan ambil lbeh deri-pada yang sudah di-tntukan kerna kamu." | 3:14 | Soldado-soldado pun tanya sama dia, "Dan kita pula, apa msti buat?" Dia kata sama dia-orang, "Jangan kamu aniayakan satu orang pun, dan jangan ambil orang punya herta dngan tipu; dan baik kamu puas hati dngan kamu punya gaji." | 3:15 | Dan waktu itu bangsa ada nanti-nantikan, dan smoa orang ada fikir-fikir dalam hati-nya deri-hal Yahya 'ntah dia-kah Almaseh; | 3:16 | Yahya jawab kata sama dia-orang smoa, "Sahya ini baptiskan kamu dngan ayer; ttapi ada satu yang datang kmdian deri-pada sahya, dia Ibeh kuasa deri-pada sahya, dan dia punya tali kasut pun sahya t'ada layak bukakan: dia nanti baptiskan kamu dngan Roh Alkudus dan api: | 3:17 | dan dia punya nyiru ada di tangan-nya, spaya tampikan dia punya trigu baik-baik, dan spaya kumpolkan yang trigu masok dalam gudang-nya, ttapi skam-nya dia nanti bakarkan dngan api yang ta'boleh padam." | 3:18 | Dan dngan banyak lain-lain nasihat dia khabarkan khabar yang baik sama itu bangsa, | 3:19 | ttapi raja Herodis, bila dia sudah kna Yahya kalot fasal Herodiah, bini sudara-nya, dan fasal smoa jahat yang Herodis sudah buat, | 3:20 | dia tambahkan ini pula atas sklian itu, ia'itu dia masokkan Yahya dalam jel. | 3:21 | Bila s-gnap bangsa itu trima baptis, dan Isa pun sudah baptis, dan ada minta do'a, langit terbuka, | 3:22 | dan Roh Alkudus pun turun atas dia dngan rupa badan, sperti satu burong komba, dan satu suara datang deri langit, "Angkau-lah Anak sahya, yang sahya kaseh; sama angkau-lah sahya berknan." | 3:23 | Dan Isa punya umor bila dia mula'i kerja-nya ada tiga-puloh bgitu, jadi (sperti orang sangkakan) anak Yusof, anak Hili, | 3:24 | anak Mattat, anak Liwi, anak Malki, anak Yanna, anak Yusof, | 3:25 | anak Matatia, anak Amus, anak Nahum, anak Hasli, anak Naga'i, | 3:26 | anak Ma'at, anak Matatia, anak Shim'i, anak Yusik, anak Yuda, | 3:27 | anak Yohanna, anak Risa, anak Zarubbabil, anak Sha'alti'el, anak Niri, | 3:28 | anak Malki, anak Addi, anak Kusam, anak Almudam, anak Ir, | 3:29 | anak Yush'a, anak Il'azar, anak Yurim, anak Mattat, anak Liwi, | 3:30 | anak Sham'un, anak Yahuda, anak Yusof, anak Yunan, anak Ilyakim, | 3:31 | anak Malia, anak Manna, anak Mattata, anak Natan, anak Da'ud, | 3:32 | anak Yishai, anak Ubid, anak Bu'az, anak Salmun, anak Nahshun, | 3:33 | anak Amminadab, anak Arni, anak Hasrun, anak Paris, anak Yahuda, | 3:34 | anak Yakob, anak Isahak, anak Ibrahim, anak Tarah, anak Nahor, | 3:35 | anak Sarug, anak Ra'u, anak Falig, anak Abir, anak Shalah, | 3:36 | anak Kinan, anak Arpakshad, anak Sham, anak Noh, anak Lamik, | 3:37 | anak Matushalah, anak Hanokh, anak Yarid, anak Mahlalel, anak Kinan, | 3:38 | anak Anush, anak Shith, anak Adam, anak Allah. |
|